له‌ ئەسه‌ردا هاتووه‌ خوای گه‌وره‌ فریشته‌ی گیان کێشانی نارد بۆ ڕۆح کێشانی ئافره‌تێک، له‌ کاتێکا فریشته‌ی گیان کیشان (ملک الموت، عیزرائیل) له‌ بیابانێکی چۆڵ و بێ خواردن و خۆراک و خواردنه‌ و بێ ئاوه‌دانی، ئافره‌ێکی بینی له‌گه‌ڵ کۆرپه‌که‌ی که‌ شیری پێ ئه‌دا، له‌ کاتێکدا فریشته‌ی گیان کێشان ئه‌م دیمه‌نه‌ی بینی، و که‌ هاتووه‌ بۆ گیان کێشان و ڕۆح کێشانی ئه‌م ئافره‌ته‌، خۆی پێڕانه‌گیرا و فرمێسک به‌ چاوه‌کانیدا ده‌هاتنه‌ خواره‌وه‌، له‌به‌ر به‌زه‌یی هاتنه‌وه‌ به‌م شیره‌ خۆره‌، که‌ به‌ته‌نها جێ ده‌مێنێت.

به‌لام فرمانی خودایه‌ ئه‌بێ جێ به‌جێی بکا، بۆیه‌ گیانی دایکی منداڵه‌که‌ی ده‌کێشێ و ده‌ڕوا، له‌دوای ئه‌م ڕووداوه‌ ساڵان هاتن و چوون، خوای گه‌وره‌ فریشته‌ی گیان کێشانی نارد بۆ ئه‌وه‌ی گیانی پیاوێک بکێشێت، له‌کاتێک چوو بۆ ڕۆح کێشانی ئه‌و که‌سه‌، چاوی به‌ پیاوێکی پیر و به‌ساڵا چوو و ده‌ست به‌گۆچان که‌وت، له‌لای ئاسنگرێک که‌ ئه‌یه‌ویست قه‌پاغێک بۆ سه‌ری گۆچانه‌که‌ی درووست بکا، بۆ ئه‌وه‌ی سه‌ری گۆچانه‌که‌یم نه‌خوورێت و تێک نه‌چێت، و به‌ ئاسنگره‌که‌ی ده‌گوت: "ئاسنێکی به‌هێز و پۆڵاینم بۆ دابنێ، بۆ ئه‌وه‌ی چه‌ند ساڵێکی دوور و به‌ر درێژ بمێنێته‌وه‌ و تێک نه‌چێت". له‌م کاته‌دا فریشته‌ی گیان کێشان و هاته‌ پێکه‌نین و سه‌رسوڕمان له‌سه‌ر ئه‌م هه‌موو هیوا و ئومێده‌ دوور و به‌ر درێژه‌ی که‌ ئه‌م پیره‌ پیاوه‌ به‌رامبه‌ر به‌ ژیان هه‌یه‌تی، له‌ دوای ئه‌م ته‌مه‌نه‌ پیری و زۆریه‌، که‌چی نه‌یده‌زانی ته‌نها چه‌ند چرکه‌ساتێک له‌ته‌مه‌ن و ژیانی ماوه‌. له‌و کاته‌دا خودای په‌روه‌ردگار و باڵاده‌ست، نیگا ئه‌کا بۆ فریشته‌ی گیان کێشان و پێی ئه‌ڵێت: "سوێند به‌ گه‌وره‌یی و شکۆمه‌ندیم ئه‌و کۆرپه‌یه‌ی که‌ تۆی هێنایه‌ گریان، له‌ کاتێک که‌ گیانی دایکه‌که‌ت کێشا، هه‌ر خۆیه‌تی که‌ به‌ پیری و هیواکه‌یه‌وه‌ تۆی هێنایه‌ پێکه‌نین و خه‌نده‌".

پاک و بێگه‌ردی بۆ خودای دادپه‌روه‌ر و خاوه‌ن به‌زه‌یی، که‌ کۆرپه‌یه‌ک به‌ بێ دایک و باوک و خزم و ئاودانی په‌روه‌رده‌ ئه‌کات و ژیانی پێ ئه‌به‌خشێ، و قۆناغه‌کانی ته‌مه‌نی تا پیری و به‌ساڵا چوویی ده‌با له‌نێو پڕ هیوایی بۆ ژیان.