گه‌ر ها‌تمه‌ لات

مۆمی رۆژی له‌دایکبوون
   له‌سه‌ر سینگم داگیرسێنه‌ و نه‌ورۆزی خۆت پیرۆز بکه‌.
گه‌ر ها‌تمه‌ لات
  چه‌پکێک گوڵی وه‌نه‌وشییت بۆده‌هێنم 
  ئاگادار به‌ باهۆزه‌یه‌ک نه‌یفڕێنێ،
گه‌ر هاتیه‌ لام
  پێکێک ماچی پڕ له‌تاسه‌
ده‌خه‌مه‌ سه‌ر لێوه‌کانت و 
هێدی هێدی مه‌ستت ده‌که‌م،
گه‌ر بێیه‌ لام
  له‌هه‌ر سه‌ره‌رێچکه‌یه‌کدا
که لێی به‌ردباران کرابووین
هه‌ر له‌ خودی ئه‌و به‌ردانه‌ 
په‌یکه‌رێکی به‌رز به‌رز به‌قه‌د به‌رزیی هیواکانمان

چێده‌که‌ین و ناوی ده‌نێین گۆڕی خه‌مان 
  دیسان ده‌چین به‌ باوه‌شێک گوڵی په‌مبه‌ و وه‌نه‌وشه‌یی
   ده‌ست له‌ملی ئه‌و پیره‌داره‌ سه‌ر سه‌وزه‌ ده‌که‌ینه‌وه‌
   که‌ ره‌شبه‌له‌ک له‌خۆده‌گرێ و

هه‌موو لق و پۆپه‌کانی له‌نێو ده‌ستمان

ده‌بن به گوڵ .. گوڵی نێرگز، 
گه‌ر ها‌تمه‌ لات
  مۆمی رۆژی له‌دایکبوون
  له‌سه‌ر سینگم داگیرسێنه‌ و نه‌ورۆزی خۆت پیرۆز بکه‌.

 
>>>>>>>>>>>>>>>>>>>>>>>
 
     
  خه‌ون.
 
چوومه باوه‌شی 
شه‌وی بێ ده‌نگ و ترسناک 
گه‌یشتمه‌ ده‌ریا
ده‌ریایی پڕ له ترسناکی شه‌و؛
له بێده‌نگیمدا
ئه‌ژدیهای دڵه‌ڕاوکێ هاته بیناییم
له نێوان ده‌ریا و ئه‌ژدیها
نه‌مزانی نهێنی شه‌و
به گوێی کامیان بچرپێنم؟
پایزه‌ ئه‌حمه‌د