هەر وەک چوون لمی دەریا بووتە دیلی
شەپووڵە بەهێزەکان و ...
هەروەک چوون گەڵای دار بووتە دیلی
ڕەشەبای پایز !
خۆم ئەبینمەوە لە وێنەی باڵندەیەکی باڵ شکاو،
لە ژێر دارێکی ڕووت و لە بەردەم لێوارەکانی دەریا !
کە نەتوانم بفڕم بەسەر شەپووڵەکانی دەریا و ...
بە دەریا بڵيم هەرگیز ناتوانیت من دیل بکەی !
کە نەتوانم هێلانە درووست بکەم و ...
بە ڕەشەبا بڵێم هەرگیز ناتوانیت دەرم بکەیت !
بەڵام ئەمە جگە لە خەیاڵی چەند چرکەیەک،
هیچی تر ناگەیەنێت، چۆنکە ...
هەندێک جار حەز ئەکەم پڕ بە دەنگ پێبکەنم،
کەچی پێم ئەڵێن:
ئەوە شێت بووی ؟!
سەیرە ! خەڵكێکی زۆر ئەبینم پێ ئەکەنن و ...
شێت نین ! ئەی بۆ پێکەنین بۆ من شێتی یە ؟!
هەندێک جار حەز ئەکەم پڕ بە دڵ بگریم،
کەچی پێم ئەڵێن:
خۆ مناڵ نیت !
سەیرە ! خەڵکێکی زۆر ئەبینم ئەگرین و ...
مناڵ نین ! ئەی بۆ گریان بۆ من مناڵانەیە ؟!
هەندێک جار حەز ئەکەم پڕ بە مەودایەکی فراوان بیر بکەمەوە،
کەچی پێم ئەڵێن:
چیە یاخی بوویت ؟!
سەیرە ! خەڵكێکی زۆر ئەبینم بیر ئەکەنەوە و ...
یاخی نین ! ئەی بۆ بیرکردنەوەی من یاخی بوونە ؟!
هەندێک جار حەز ئەکەم پێنووس بکەمە چەکووچی داد،
پەڕە بکەم بە گۆڕەپانی ڕاستیەکان ...
کەچی پێم ئەڵێن:
ووریابە خۆ لادراو نیت !
سەیرە ! خەڵکێکی زۆر ئەبینم خاوەن ووشە و ...
لادراو نین ! ئەی بۆ پەیڤەکانم تاوان بێت ؟!
کە وا بێت ...
من مناڵێکی شێتی لادراو و یاخیم !
بەڵێ وەک مناڵ ئەگریم بۆ ساتە ڕۆیشتووەکان !
کە نەمتوانی مناڵیم تیا بەسەر بەرم !
کە نەمتوانی هەست بە ساتەکانی مناڵی بکەم و ...
بگەمە لۆتکەی ئامانجەکان،
کە لە خەونە ڕەنگاو ڕەنگەکانم دا ئەم بینین !!!
بەڵێ شێتانە شەیدای ئەو ساتانەم کە بتوانم،
هەست بەوە بکەم من ناخم زیندووە !
بە پانتایی ئاسمان شەیدای ئەوەم ...
هەست بکەم بوونم هەیە لە ژیانێک،
هەرچەندە وێرانەش بێت !!!
بەڵێ مناڵێکی لادراوم !
لادراو لە و ڕێگا وونەی بۆم دەستنیشان کراوە !
لادراو لەو چارەنووسەی،
هەموو بەها جوانیەکان دەشێوێنێت و ...
لە ناویان ئەبات !!!
بەڵێ مناڵێکی یاخیم !
یاخی لەو کۆمەڵگایەی کە وەک مردوو وایە !
لەو خاکەی وەک گۆڕ وایە و ...
هەمیشە گەورەترین هیواکان ئەخاتە ژێر گڵەوە،
بەنرخترین ساتەکان لە ناو ئەبات !!!
ئەی ڕۆژگارە سەختەکانی ژیانم تا کەی ...؟
تا کەی "بۆ"یەکانم بێ وەڵام ئەبن ؟
کەی لە زیندانی بێ ئۆمێدی ڕزگارم ئەکەیت و ...
ناخێکی زیندوو ئەبەخشیتە ناو جەستەمەوە ؟
کەی ئەبمە ئەو باڵدارەی چووک بە شەپووڵی دەریا و
ڕەشەبای پایز دا بدات ...؟
کەی .......؟
