کەشوھەوای ساردو ئاژەڵە ناوازەکان لە ھەرێمی لاپلاند سەرنجی ژمارەیەکی زۆری گەشتیار بەلای خۆیدا رادەکێشێت.
لە دووری ٢٥٠ کیلۆمەتر لە باکووری ناوچەی بازنەیی ئارکتیکەوە، ھەرێمی لاپلاند دەبینیت کە کەوتۆتە ناوچەیەکی باکووری فینلەنداوە، بەردەوام کەشوھەوایەکی ساردی ھەیەو ھاوکات مۆڵگای ئاسک‌و ئەو ئاژەڵانەیە کە توانایان ھەیە بەرگەی ساردو سەرما بگرن.
ھەموو ساڵێک‌و لە مانگی کانونی دووەم دا، لەو ھەرێمەدا تەنیا چوار بۆ پێنج سەعات رۆژ دەردەکەوێت، بۆیە گەشتیاران بەرێژەیەکی بەرچاو رووی تێدەکەن‌و چێژ دەبینن لە مانەوە لە دیمەنی ئاسمانی ئەو ھەرێمە.
لەلایەکی ترەوە لە گوندی (کاکسلاوتانین ئیگلۆ) چەندین کۆشکی تایبەت لە شوشە دروستکراوە تا بگونجێت لەگەڵ مانەوەی گەشتیاراندا لە ناوچەکە.
ئەو کۆشکانە کە لە شێوەی ھۆتێل دا دروستکراوە، بوار دەداتە گەشتیاران تا لەنێو ئەو سەرماو سۆڵەیەداو چێژوەربگرن لە مانەوەیان لە ناوچەکە دا.
مێژووی دروستکردنی ئەو ھۆتێلە ناوازەیەش دەگەڕێتەوە بۆ ساڵی ١٩٨٨ کە تێیدا بۆ یەکەمینجار بیست کۆشک دروستکراو میوانان روویان تێکرد.
بەو ھۆیەشەوە ساڵانەو لەم کاتەدا رێژەیەکی زۆری گەشتیاران روو دەکەنە ھەرێمەکە، کە دەبێتە باشترین دەرفەت بۆ بەسەربردنی کاتێکی خۆش لەبەر رووناکی باکوری ئەو ھەرێمەدا.
شوشەی کۆشکەکان بەپاکی دەمێننەوە تا بتوانی لەشەویشدا چێژ لەو بارودۆخە ساردوسەرمایە وەربگریت‌و شەوێکی ناوازە لەو ناوچەیە بەسەربەریت، ھاوکات بتوانیت ئاشنابیت بەدیمەنی ئەستێرەکان.
لەرۆژیشدا، دانیشتوانی ناوخۆیی ھەرێمەکە، گالیسکەی تایبەت ئامادە دەکەن کە ئاسک رایدەکێشێت‌و خۆیان دەپێچنەوەو بەناوچە جیاکانی ھەرێمەکەو بەناو بەفرەکەدا ھامشۆ دەکەن‌و کاتێکی خۆش بەسەردەبەن.
ھاوکات خۆشیان ئەندامی چەند گروپێکی ناوخۆیین کە ئەرکیان پێشوازیکردنە لە گەشتیاران‌و ئەو کەسانەی بۆ بەسەربردنی کاتێکی خۆش لەو ناوچەیەدا دەمێننەوە، سەرباری رێنوێنیکردنی گەشتیاران‌و دابینکردنی ھۆکاری ھاتوچۆو مانەوە لە چادرگەکانی سنورەکە دا.

kurdsat.tv