دانی به‌ كوژرانی ئوسامه‌ بن لادن نا 
PNA – ئه‌مڕۆ رێكخراوی قاعیده‌ له‌ به‌یاننامه‌یه‌كدا كه‌ له‌ سایتێكی سه‌ر به‌و رێكخراوه‌ بڵاوبۆته‌وه‌ كوشتنی ئوسامه‌ بن لادنی پشتڕاست كرده‌وه‌, به‌ڵێنیان دا تۆڵه‌ له‌ ئه‌مه‌ریكا و هاوپه‌یمانه‌كانی بكه‌نه‌وه‌.

دوای پێنج رۆژ له‌ راگه‌یاندنی كوشتنی ئوسامه‌ بن لادن, ئه‌مڕۆ رێكخراوی قاعیده‌ كوژرانی سه‌ركرده‌ی رێكخراوی قاعیده‌ی پشتڕاست كرده‌وه‌ و رایگه‌یاند به‌م نزیكانه‌ تۆمارێكی ده‌نگی بن لادن بڵاو ده‌كه‌نه‌وه‌ كه‌ هه‌فته‌یه‌ك به‌ر له‌ كوشتنی تۆمار كراوه‌.

به‌ڵێنیان دا له‌ ئه‌ركی خۆیان به‌رده‌وام بن و تۆڵه‌ له‌ ئه‌مه‌ریكا و هاوپه‌یمانه‌كانی له‌ ناوه‌و ده‌ره‌وه‌ بكه‌نه‌وه‌و داوایان له‌ گه‌لی پاكستانیش كرد به‌ڕووی ئه‌وانه‌ی ئوسامه‌یان كوشتووه‌ هه‌ڵسن و شۆڕش له‌ دژیان به‌رپا بكه‌ن هه‌روه‌ها له‌ دژی ئه‌وانه‌ی كه‌ هه‌موو شتێكیان به‌ دوژمنی میلله‌ته‌كه‌یان فرۆشتووه‌.

هه‌ر له‌ به‌یاننامه‌كه‌ هۆشداری ئه‌مه‌ریكا كراوه‌ له‌ ده‌ستكاری كردنی ته‌رمی ئوسامه‌ و ئه‌وانه‌ی له‌گه‌ڵی كوژراون و هانی ئه‌مه‌ریكای داوه‌ ته‌رمه‌كان راده‌ستی كه‌س و كارییان بكه‌نه‌وه‌.

s/peyamner