ئه‌شك
شیعری : ئه‌حمه‌د محه‌مه‌د
ئه‌ی ته‌نیایی، چه‌ن شـیرینی، بۆ تاڵی و سـه‌ختی ژیانم
گه‌ر تۆم هه‌بێ‌ ، كه‌سم ناوێت، تۆی دڵسۆزی خه‌م و ژانم
وا بێكه‌س و بێ‌ میوانم دایمه‌ ده‌رگام داخراوه‌
نوسراوی ناو له‌پی ده‌ستم ته‌عبیرێكی ئاڵۆزاوه‌
هه‌ور به‌سه‌ر سه‌رما ئه‌گری و نمنم ئه‌شكم بۆ ئه‌ڕێژێ‌
پاییز له‌ سـێبه‌ری خۆیا جه‌سـته‌ی گه‌ڵام بۆ ئه‌نێژێ‌
هاوسه‌فه‌رم سایه‌ی خۆمه‌ كه‌ خۆر نه‌بێ‌ ئه‌ویش نایه‌
جاربه‌جارێ‌ دڵخۆش ئه‌بم كه‌ ئه‌بینم هاوڕێم بایه‌
كه‌ ئاشنای ته‌نیایی بووم قه‌دری نه‌بوو لام یه‌كه‌مجار
هه‌تا ڕۆژێ‌ زۆر خه‌مبار بووم له‌گه‌ڵ ئه‌وا چوومه‌ كه‌نار
ئه‌وسـا زانیم كه‌ ته‌نیـایی دانیشـگایه‌ بۆ ده‌روونم
به‌ڕابردووی خۆما ئه‌چم ده‌رسی تازه‌ی تیا ئه‌خوێنم