ڕۆشنبیر لەسیاسەتی ڕۆژانە قسەدەکات، بەڵام دەزانێت قورسایی بوونی وەک رۆشنبیر لەسیاسەتەوە نایەت، هێزە ڕەمزییەکەی لەوەدا نییە کە لە سیاسەتەوە وەریدەگرێت. ئەوەی بەرەو سیاسەت پاڵی پێوەدەنێت، پەیوەست بوونە ئاخلاقییەکانییەتی بە ژیانەوە. دەزانێت گەر هونەرمەندێک تابلۆیەکی خراپ بکێشێت، کەس ناکوژێت، گەر شاعیرێک شیعرێکی خراپ بنوسێت، کەس تووشی هیچ نەهامەتییەک ناکات، بەڵام کە سیاسییەک هەڵەدەکات چارەنوسی چەندان هەزار دەخاتە مەترسییەوە. ڕۆشنبیر نەلەبەرئەوەی سیاسەتی بۆ گرنگە هەڵوێستی سیاسی وەردەگرێت، بەڵکو لەبەرئەوەی مرۆڤی بۆ گرنگە باس لە سیاسەت دەکات.